請選擇 進入手機版 | 繼續訪問電腦版

明愛賽馬會屯門青少年綜合服務 - 青年叻網上電台

 找回密碼
 註冊
查看: 1897|回復: 0

[轉帖] 做個勇敢香港人

[複製鏈接]
發表於 2012-6-30 17:44:33 | 顯示全部樓層 |閱讀模式
<周潤發 - 回歸十五年 做個勇敢香港人 搵食就係核心價值>
壹週刊S020-022)

529246_10150932771586009_363105015_n.jpg
周潤發五十七歲

影視明星
...
周潤發由我們眼中的鄰家男孩「發仔」變成親和力爆燈的「發哥」,卻從來不是高高在上的「發爺」。出身於南丫島,從酒店bell boy一步步爬升到今日的荷李活巨星,香港人看到他,就覺得即使出身草根,只要努力,還是可以靠一雙手打拼成為「上等人」。縱使有過億身家大屋靚車,他成名後還是堅持一支公搭巴士逼地鐵周圍去,到香港郊野拍攝蝶蹤。

他做人「念舊」,心繫香港的草根階層。問他香港人有什麼核心價值,他仍是那個踎在片場扒飯盒的發仔:「香港人要捍衞嘅核心價值,就係有三餐溫飽,夜晚一宿囉,這是最重要的。」他說,回歸後怨氣沖天,關鍵是香港人「搵唔到食」。

他說香港近年民不聊生,窮人無屋住,小商戶想做生意,又要供強積金又要交貴租,看碟頭飯價錢,就看得到民怨:「我哋廣東人香港人成日話搵食搵食,搵個竇口踎吓,簡單到不得了,使乜搞到咁複雜啫。你睇那些碟頭飯由幾多錢開始,一路扯到現在三十幾蚊,你就知道鋪租愈來愈貴啦。」

不如開拓螞蟻業

住九龍塘的發哥,經常到九龍城買餸,二○○八年曾經被電視新聞拍攝到他逛街市,大談冰鮮雞和生雞的味道如何。他近年「落區」看到小商戶難以生存:「而家喺香港,發達係無可能啦,你落街,乜都俾啲大集團壟斷晒,衣食住行呀、打工呀,樣樣都唔知俾咗邊個大老闆。在樂富好多街坊都說,領匯來了就索性不做,然後又變回大商場囉。你諗吓全世界最貴個鋪,原來係銅鑼灣細細個賣魚蛋那間,你話幾諷刺。」

不但小企業,連年輕人其實也無出路。發哥讀書不多,中三畢業,做過酒店門僮、郵差和推銷員,今日也可以成為荷李活巨星。叫他想一想,若今日自己在香港做年輕人,有什麼出路,他也頭痕。香港工業全部北移,現在只是靠大陸自由行,年輕人只能做服務業。他反諷道:「大學淨係開幾科咪得囉,物流業、管理業、酒店業啦。唔使咁多範疇啦,讀完又無工做。」他建議政府開闢第七產業叫螞蟻業:「走水貨囉,就是螞蟻業,螞蟻搬家嘛,日日喺羅湖上水走水貨。」年輕人沒出路,老人家更悽慘。發哥形容,老人家退休後,拿着三千元不到的生果金,每天一百元是沒可能生活。「喺香港,每日只得一嚿水就邊度都唔去得,你飯盒都三十幾蚊一個,仲要唔好病喎,如果睇吓醫生,執啲袪濕茶都唔夠錢,老人家靠一嚿水一日,真係好掹水。」事實是,梁振英只承諾會把老人生果金加到二千二百元,三千元是落選唐英年的過氣承諾。

高抬貴手咪亂拆

發哥若不用到海外拍戲,就會拿着古董照相機,到香港郊外四處尋幽探秘,一邊行山一邊拍攝美景。二○○九年發哥就以個人名義在中央圖書館舉行名為「香港印象」的攝影展。看到漂亮的郊外被城市化,發哥也感到不滿,希望政府要搞好鄉郊保育。他主動提到近日的沙螺洞保育戰,力撐保育人士,希望政府回購沙螺洞,不應該讓地產商用來建骨灰龕:「你那些客家圍村很有歷史價值,比清政府還要老,沙螺洞咁靚嘅地方,真是好靚好靚的郊野公園,那裡有這麼多蝴蝶品種,再加上鳳園的蝴蝶區,你應該有一套方法整番靚佢,不用你好多錢。」

發哥近年最為人津津樂道的,就是他在二○○七年四月一個凌晨,到皇后碼頭探望在那裡靜坐反對清拆的保育人士,被保育界譽為英雄人物。近日爭議激烈的舊政府總部西座,發哥也希望政府高抬貴手,保留英式舊建築,更強調要保育就要整個「舊樓群」,不能拆一幢保一幢:「舊政府總部現在要拆真係無厘頭!你新政府總部咁大,舊的地方你要來做乜,你留住這一個舊樓群,做歷史保育咪好囉。呢啲係舊式殖民地建築,有五、六十年代那種簡樸,實而不華,現在全部樓都係玻璃幕牆,你保留番這些東西是好的。橫掂你何東都買唔到,就唔好拆呢度啦。」

曾蔭權坐火箭論

發哥經常在公共交通工具上留下腳毛。前陣子曾蔭權被揭豪坐私人飛機豪住總統套房,社交網站瘋傳發哥cap帽T恤look一支公坐港鐵逼巴士的照片,網民都慨嘆,高官要學習發哥的簡樸。發哥被網民「擺上枱」來批評曾蔭權,他妙答道:「即係如果市民個個有得食有得住,莫講話私人飛機又好,空軍一號又好,你曾蔭權坐火箭都無所謂,佢上太空好像楊利偉咁揮旗囉,大家都會好開心拍手掌o架,因為你政績做得夠好嘛。現在問題是怨氣太大,你又做唔到嘢,你又要豪花,所以係人都嬲囉。」

發哥說搭地鐵只因貪方便:「人各有志啦,可能曾蔭權認為自己地位超然,一定要這樣做至配得起佢特首身份,係身份象徵。我沒所謂,貪方便,唔想塞幾個鐘過海,寧願坐港鐵三分鐘到中環。」他說,小市民介意的是你住港督府大家卻無瓦遮頭:「小市民覺得,你要俾我有個地方踎吓先,至少我喺屋企食公仔麵,不用去瞓街俾人睇到,衰到要瞓街好無面,你住港督府你就有面啦,係咪!」

石塘咀與西營盤中間

雖然發哥說,大家最關心搵食,但他卻支持市民繼續遊行,繼續去中聯辦抗議:「我要糾正一樣嘢,那裡不叫西環,因為我喺西環長大的,那裡是西營盤同石塘咀中間。你成日衝去石塘咀同西營盤中間呢,個個禮拜都有,加埋政府總部;還有每年七一加上維園燭光晚會,這些怨氣是不能被打壓的,長毛係一定要繼續抬棺材的,這是必要的指定動作,因為這是代表香港的自由繁榮、言論自由,無這樣嘢香港就無價值o架啦。」

中央政府說香港可以「五十年不變,馬照跑舞照跳」,發哥說,某程度香港一定變了,每個領導人上場也會有些轉變,問題是變多少,變得好還是壞。他奉勸梁振英一上場,必須幫助升斗市民搞好民生,減低民怨:「現在是下面煮緊水,上面就蒸緊糉,愈搞愈大鑊,愈來愈爆煲,係天怒人怨o架,你收埋咁多儲備做乜啫,又唔係要買彈藥打仗。」他建議新政府快點找地建公屋,讓排隊輪候公屋的人上樓,又請社會福利署「派多幾個飯盒給有需要的人」,推出政策協助低下層的人:「你試吓將現在瞓街的、籠民呀、新移民推上樓住,到時仲邊有咁多怨氣嘈嘈閉呀,就不會有這麼多人上街。」

喬靖夫 facebook 30/6/12

高級模式
B Color Image Link Quote Code Smilies

本版積分規則

QQ|小黑屋|Archiver|手機版|青年叻網上電台

GMT+8, 2019-1-20 07:03 AM , Processed in 0.331045 second(s), 18 queries .

Powered by Discuz! X3.4

© 2001-2017 Comsenz Inc.

快速回復 返回頂部 返回列表